銀河守護隊3
- 查看其他版本
觀眾影評
Marvel終於有一套似樣返嘅電影，
仲係少數令人落淚又哭笑不得嘅作品，
主線清晰，人物描寫深入感人，
節奏明快，動作場景運鏡得宜，
但礙於內容豐富，導致唔少剪接流暢度問題，
同埋令人忍唔住R頭反駁嘅位。
讚咗先，音樂方面Guardians of the Galaxy 系列從來都唔會令人失望，靈活運用唔同年代嘅舊歌，加插喺科幻片入面都完全唔會old school/唔夾，仲超洗腦。
文戲方面，今次Rocket條主線可以話係Marvel歷來最感人同最深入嘅主線，同場好多觀眾，包括男士都忍唔住都為Rocket同佢嘅朋友哭能咗，特別欣賞James Gunn安排Rocket後面救動物嘅一幕，用返同一條鎖匙，其實係Rocket彷彿回到過去，完成緊自我救贖，如果冇Rocket，相信架船最後只有智慧型生物走得甩。
James Gunn算係平衡得幾好，主題即使偏向沉重，但一啲都冇嗰種“so dark, are you from the DC Universe?”嘅感覺，（雖然佢黎緊真係主力過檔DC..）整套電影加插咗唔同嘅笑位，透過團隊入面唔同嘅碰撞同磨合自然咁令大家輕鬆笑出黎，好耐冇試過睇套戲又喊又笑。
打鬥方面不得不讚走廊全員集合嘅一幕，呢啲就係Marvel消失咗好耐嘅打鬥場面同運鏡！咁窄嘅空間，一樣可以睇到合體技，一樣可以睇得清楚每個人打緊啲乜，個個出招都充滿住自己嘅能力同性格，仲要絲毫眼殘嘅感覺都冇。點少得Groot+Star Lord 2個人全彈發射打全世界嗰幕，又係睇完之後超深刻，好耐冇試過睇完Marvel嘅打鬥場面會記得嗰幕同埋運鏡係點。
化妝都非常值得一讚，特別係中段出現咗大量人型動物角色，大部份都唔係用CG，而係用特技化妝，嗰度仲要成村人，可以令人一睇就睇得出邊種動物，真心勁。
最後仲想讚埋James Gunn個首尾呼應，如果有睇前兩集，就會知系列嘅開始，就係Star Lord聽住Come and get your Love去搵力量寶石，去到今集系列嘅尾聲，Rocket: "This one's kind of special." 只有粉絲先會知道呢個首尾呼應special得很。
讚完之後，中肯啲講返，一樣有啲位令呢套戲扣咗分。
由於內容極之豐富，除咗浣熊主線同佢嘅動物朋友，又要交待唔係呢個時代嘅Gamora點樣重新認識團隊，仲有主角對自己嘅迷茫，仲有隊員本身彼此嘅矛盾，新出場壞人嘅目的背景，仲有2件唔知做乜春嘅金粉餅（淨間先再屌呢兩件金粉餅）一黎交待得好急，如果觀眾跟唔上/一唔留神就好易會miss咗野，仲有唔少剪接同流暢度問題，好似走廊大戰打完唔夠幾秒就見到全員跑緊，好多中間嘅野cut咗咁。
仲有都係同Ant man 3一樣嘅戰鬥力問題...今集boss戰力都係衰在好飄忽...開頭用引力屌打Adam Warlock...後尾Rocket一對反引力鞋就已經完勝佢...咁問題就黎喇，以Adam Warlock咁勁嘅存在，雖然佢初初受咗傷姐，但有咩理由會比個boss屌住黎打到郁唔到...
另外反駁嘅位係Star Lord身上，有睇前兩集都知Star Lord喺Ego死咗之後，佢已經冇咩特別能力，係元素槍，太空面罩，噴射靴，領導能力之類...你老尾去到第3集個個Gear都有Upgrade，Nebula都識飛，浣熊有引力鞋，連Groot都有幾支槍旁身！仆你個街Star Lord會喺太空差啲凍死？唔係呀嘛...面罩呢？噴射靴呢？導演你為咗逼Adam Warlock救人，導演你唔係拎走晒Star Lord啲裝備咁黑心呀fa...好心你係都寫浣熊行最後差啲凍死啦...咁都起碼講得過呀嘛...
最後屌一屌兩件金粉餅，我知...係第2集遺留落黎嘅蘇州屎...Adam Warlock喺Marvel世界有幾勁我都知...但係我睇完成套戲，真心唔知佢做乜鳩，直頭係冇咩存在價值，（唔關演員事，邊個演都係衰的了）佢咁屈機，關鍵時刻又暈...又力不從心咁，好心是但搵個無名刺客片頭嗰幕取代佢行刺，cut走晒金粉餅母子，Star Lord有返面罩同噴射靴...成套戲交待唔洗咁急，根本唔影響所有劇情之餘仲好睇咗...
雖然有呢啲唔完美嘅地方，但由於好嘅地方都算係蓋過咗呢啲瑕疵，總括黎講都有8分~為Guardians of the Galaxy系列畫上一個唔錯嘅句號。
P.S. 腦入面仲loop緊Come and Get your Love
一般