死屍死時四十四
- 查看其他版本
觀眾影評
相當喜歡新導演何爵天的《正義迴廊》，急不及待去觀看《死屍死時四十四》，想了解何導是真有實力，還是只是偶有佳作，答案是前者，是真有實力。
《死屍死時四十四》是一齣很精彩的黑色喜劇，反映香港一些荒謬情況，觀眾在觀賞期間一邊笑，一邊反思，有許多共鳴。這一齣戲以群戲為主，有些演員在群戲中會表現得格格不入，但這齣電影老中青三代演員都恰如其分。最感動的是劉江和黃文慧這一對，最精彩是李尙正。毛姐重拾《92黑玫瑰對黑玫瑰》及《家有囍事》的神韻，Ronald有《低俗喜劇》的狂放。阿卵正劇喜劇都得心應手，演技無容置疑。黃又南發揮正常，余香凝越演越穩，Edan的演技實力不容忽視。舞台劇演員胡麗英今次發揮不算多，但都相當具喜感。
因演員太多，劇情去到中間有少許拖拉和散亂，但這只是何爵天第二齣電影，而已有這種功力，所以我給10分。
急不及待要睇優先場，想睇下導演繼正義迴廊後會拍一套點嘅作品，睇完真心讚。
好耐冇睇過一套戲係全場一齊大笑、拍手；2個鐘嘅瘋癲劇情我諗間斷咁笑足90分鐘，仲要d笑位係如果你係响香港生活、長大嘅人一定睇得明一定會笑。但又笑中有淚，有某d位又會令我諗下野，但諗完都只係覺得荒謬+無奈。
超多好戲之人 毛姐、Ronald 、劉江、楊偉倫；仲有d新生代余香凝、又南、Edan、Hanna，最緊要嘅緊係成套戲嘅MVP 李尚正，每位演員都有令人印象深刻嘅位，劇情豐富得嚟又唔覺混亂，細節位仲有首尾呼應，天導真係好犀利。
P.S. 毛姐嘅演出令我諗起《92黑玫瑰對黑玫瑰》&《家有喜事》
睇咗優先場, 首先覺得呢套戲真係好睇, 同埋好好笑,
基本上大部份時間都係笑緊, 拍緊手,
甚至會因為大家笑得太大聲而聽唔清楚之後啲對白 (所以絕對要再入場睇)!
仲有呢套戲真係好荒謬,
故事內容荒謬就不在話下啦,
仲要佢明明係黑色喜劇,
但係又會有突如其來嘅感動位,
同埋要重新強調一次,
個故事真係好荒謬,
但係正因為當中提及嘅好多嘢都係香港人每日都經歷緊嘅時候,
令我不禁去諗
究竟荒謬嘅係呢個故事, 定係呢個世界?
當一路睇落去睇到最後,
發現呢個故事唔止好笑, 荒謬, 而且仲有啲可悲,
同樣會令我去諗,
或者現實有更多人同事比呢個故事更可悲?
鍾意呢套喜劇電影,
在於佢唔係一套笑完就算嘅電影,
而係喺當中有好多值得思考嘅位,
係一套有嘢可以帶走嘅電影!
雖然佢係以香港人買樓作為一個核心題材,
但內裡包含嘅
卻係香港人面對緊嘅各式各樣嘅問題,
好佩服導演同編劇能夠將呢啲看似風馬牛不相及嘅問題,
透過一班住戶將佢哋串連埋一齊,
令我喺睇完, 笑完, 開始步出戲院之際,
就開始反思呢啲問題。
真心推薦《死屍死時四十四》呢套電影!
好好睇，值得一讚，導演好嘢，我畀五粒食
一部令人值得反思的電影，電影中五個業主為物業付出不少精力，部分卻沒有完全享用家中之樂；新聞中見到的垃圾屋也是同類。
電影傳遞一家人和諧最重要，我們要努力在物質和精神上的融洽。
演技派演員也為香港電影努力付出，盼更多人繼續支持香港電影。