過時·過節
- 查看其他版本
觀眾影評
《過時•過節》係一套好真實貼地嘅故事。雖然故事係改篇自導演嘅自身經歷, 但同時亦係描述緊好多香港人喺自己嘅原生家庭所面對嘅矛盾同掙扎。相信觀眾會喺睇嘅過程中會對某啲角色或者某啲情節產生共鳴。如果冇嘅話, 恭喜你! 相信你嘅家庭過得相當幸福美滿!
好鍾意導演嘅呢套電影對每一個家庭成員都有好好描述, 並冇特別過份側重於個別家庭成員, 始終家, 從來唔係由一個人去建立, 而問題、矛盾、衝突, 都係一個巴掌拍不響。雖然話家家有本難唸的經, 但好多時問題或者都係出自同一個原因 - 溝通身上。
睇得出劇中每個角色都好在乎呢個家庭, 但係缺乏溝通就成為咗佢哋之間最大嘅一個問題。"溝通唔係一個選擇, 而係障礙"呢一句令我印象尤其深刻。溝通嘅重要性, 相信好多人都好清楚, 但係點解咁多人, 包括我, 卻唔能夠做好呢門功課呢? 呢個問題纏繞咗我好耐, 我一直明白但始終走唔出第一步, 所以當聽到呢句說話嘅時候, 眼淚就不自覺咁流出嚟。呢部電影某程度上可以算得上係我嘅一個therapy, 令我有空間去好好重新審視我對家人嘅態度, 同時好好去梳理自己嘅情緒。此外, 亦令我反思到底家係咩嘢? 係唔係一定要大家喺同一個空間居住, 相處先叫做齊齊整整? 家點解一定要齊整?
呢套電影能夠打動人心, 除咗一個溫暖真實嘅劇本之外, 當然唔少得一班演員啦! 毛姐, 君豪哥, 波姐等好戲之人嘅演技自然係毋庸置疑, 佢哋好多時嘅一舉一動都輕易地引起觀眾嘅情緒。阿談同Angela嘅演出都相當自然, 令人驚喜。值得一提嘅係Edan嘅演技。呢個角色同佢一貫俾人嘅印象或者係過往做過嘅角色大相逕庭, 而佢以往都俾人不擅處理內心戲, 喊唔出嘅印象。但就算我喺最開頭有過咁樣嘅疑慮, 亦好快撇除咗, 能夠專心咁投入喺電影嘅世界當中。雖然算唔上天才級嘅演技, 但的確進步唔少, 拍住一班好戲嘅前輩都絕不失禮, 合格有餘!
到最後主題曲嘅部份, Edan以阿陽嘅身份, 用一把淡然嘅聲線去唱出嚟, 配合埋歌詞同樂曲, 就好似阿陽喺度讀緊一封將自己難以啟齒嘅心底話寫出嚟嘅信一樣。又或者, 呢首主題曲係導演以呢套電影作為寫俾屋企人嘅一封信入面最完美嘅總結。有趣嘅係, 似乎係電影入面播放嘅主題曲同串流平台上聽到嘅並唔係同一個編曲, 感覺上電影版編曲再簡單啲再raw啲, 令阿陽嘅情感再直接啲再出啲, 有種好溫柔好溫暖嘅感覺! 我個人嚟講兩個版本都有我自己好鍾意嘅部份, 所以絕對會為咗多聽幾次電影版本而再入場睇!
希望無論係鏡粉定非鏡粉嘅你, 都可以摘下你對鏡仔嘅濾鏡, 呢部絕對係一部值得大家欣賞嘅電影。
有的人生活在一個相親相愛的幸福家庭，但有的人跟家人的關係更似相愛相殺，在家人前，會將最真實、最壞的脾氣、最傷人的說話留給家人。
看到最後，感慨一家人不是不愛這個家，卻是用了自己認定的方式去愛，相信自己付出了很多卻得不到想要的回應，原來只是沒有溝通好，才一直讓家人沒有接收這些愛和付出，還長久以來傷害了對方也傷害了自己。到了第二場冬至飯局前，幾個人一直拉緊的結（特別是夫妻、父子）終於稍稍鬆綁，大家才在空隙中看到了對方。
結局的表現手法很有心思。一家人的心意溝通，不在於那餐冬至飯是否全部人坐下來一起吃。反而鏡頭的心思，足夠讓人想像之後這家人會如何走下去。現實不是這樣嗎？一直緊繃的結不會一下子立刻解決，但在那個晚上，出現了希望。最後的一幕加上主題曲，為電影帶來回想和想像空間的餘韻。
你拍出黎 最真實系錢同樓起分爭，內容悶，劇情唔夠真實，香港家庭比你呢更慘都有，咩細節都無，個女結婚離婚都無交代，做鐘點做到有感情仲勁，打工都講感情，個老公仲勁忍到8年供完樓，好似大義講離婚因為想個仔黎，個仔就話8年一句野老豆無交代，舅父無任何交代就無廚房死埋，個女識個華橋個段唔知你想交代d咩，我都唔明點解會買飛睇你一家無嘈交，唔係有毛姐 呂爵安 談善言嚟睇，連6分都唔值，成套野抽象到似垃圾作品，抽到咁不如唔好你拍出黎
注意:呢套唔係偶像電影,請放下任何偶像濾鏡嚟睇 過時•過節.
好寫實嘅一套電影,冇賣弄任何親情,結尾唔會為咗取悅觀眾而圍爐BBQ,真實到完全置身喺呢個家庭入面,可能因為同我細個有差唔多嘅遭遇,好快已經代入咗,開場冇耐已經喊,太有共鳴,令我反思同屋企人嘅關係
演員方面:
mo姐君豪嘅演技冇嘢可以挑剔,
呀談同Angela嘅喊戲值得回味,尤其係Angela,一直我都覺得佢係一個花瓶,去到Joy呢個角色令我會加佢分數
Anson Lo嘅有待觀察
最令我眼前一亮嘅係Edan,一直都好想睇佢做正劇正戲,今次果然冇令我失望,尤其係喊位,喊得比以往角色都靚,而佢嘅內心戲亦好到位,不多不少,恰到好處.
最後我想講電影完結之後嘅主題曲,當音樂響起嘅時候再入返之前嘅畫面,你會更加忍唔住
雖然都是近期多用的「家庭」做主題
但這套電影拍攝的手法很不一樣
描寫陳家一家四口
過著平凡簡單的生活
理應很快樂
但就因為缺少溝通、讚賞、支持
大家內心都有不同的傷口
有人會逃避、有人會控訴、也有人一走了之…
就好像戲中表姐Joy (Angela飾)同阿陽(Edan飾)的對話
我被這場感動了
為何要執著一些位
令大家都不好過
有一些機會錯過了就無辦法重來
阿陽跟VR的對話～很感動
原來有很多心底話其實很想說
但面對面卻不知怎說
其實溝通是一種操練
不常用～到想說的時候就說不出
Edan的演技比起之前明顯進步了
演繹到阿陽的執著
嬲到喊 只因為著緊
很喜歡最後ending
有的關係上的變化
有的帶著一些遺憾
但沒有說得清楚明白是怎發展
等大家有思考空間
其實當大家都有心想前行
這家人的關係最終都可以變得美滿
就視乎你的行動與回應
「這愛與恨 問誰能計」
一家人又怎能樣樣計得清清楚楚 誰對誰錯
「你若會 我若會 卸除 一切防衞」
每人行一步 關係變得不一樣了
電影主題曲是阿陽唱給家人的情書
每句歌詞都得有意思
近期樂見香港出現－些不可多得的新進導演。繼何爵天之後，我看到過時. 過節的曾慶宏導演也是不可多得，另－種風格，很不－樣。
不是－般港產片的套路，非常寫實（可能因為是導演真人真事吧），對劇情鋪排，拍攝角度好有睇法，很有看電影節外國作品的感覺，很有風格！
可能不是人人自身都有共嗚，但在香港你總會見過這樣的阿媽阿爸，而戲中要強調的應該是香港很多家庭不懂溝通但內心其實着緊家人的這種心態。單看表面劇情，你可能不能一時間窺探導演想表達的真正內容，但回家後，劇情內裏意義就會在腦海越滲越多出黎，原來每段內容也有意思，連螞蟻也有其意義，好過癮！各演員演出恰如其分。最後提提劇終的主題曲，很好聽，詞很到位，袁兩半（潘源良）真係大師級！ 給電影加分！
有深度，有睇法，很不－樣！希望更多知音！ 更多人珍惜和支持香港這些人才！繼續努力！
推薦理由：看完《過時·過節》，等於多活了三個世代的人生。有相似家庭經歷的，看完之後一定會有所共鳴。 即使沒有相似的經歷而無法身同感受，亦可以透過電影了解截然不同的人生經驗。
整個影片的一大特色是充滿隱喻和細節，如果你沒有觀察到這些細節，那就需要再入場多看一次，一定覺得更加好看。以文藝片的手法拍攝，一定會比商業片稍微燒腦一點，但那沉浸的體驗卻是獨一無二的，投入去觀看很容易置身其中，以陌生人的身份看著這一家人正在發生的事情，心有戚戚焉。電影所傳達的信息量之大，我敬佩導演的敘事能力，畫面和片段的組接能力，以及配樂的帶動能力。
家家有本難唸的經，然而家庭衝突的方式是普世的，都會以一種相差無幾的方式表現出來。阿陽一家人的故事，發生在我們身邊，甚至發生在我們身上。
劇終，主題曲《攀上天梯的螞蟻》唱起。
「我想要步上天梯 重求取共你一切如何寶貴
而明知結果可能仍然充滿缺陷
傷已太深 沒人能計
誰明我 徘徊狂風裡的蟻」
電影落下帷幕，誰知道阿陽一家人的故事，在打破僵局以後，是新的爭吵，沉默，還是相安無事？或者都有吧，生活的模樣不止一種。
一套好嘅電影 應該係要令絕大部份觀眾都有共鳴
而唔係淨係令有相似處境嘅人身同感受
喺講故事嘅時候
故事嘅鋪排、節奏、角色嘅互動、畫面
其實每一個細節都會影響觀眾對電影既觀感同投入
坦白講 我覺得套戲係好多方面嘅處理都唔好
成個故事好平鋪直敘 節奏係慢而悶
角色之間有矛盾 但流於表面
前面嘅鋪墊唔夠就爆發咗
爆發完又無足夠嘅情節去刻劃
一味就係 我嬲阿佢 我唔滿意佢 我唔鍾意呢度
所以會令一般人/理性撚無共鳴
成個故事嘅核心思想又唔清晰
因為全家人都有問題
但個問題係咪純粹溝通問題？
佢哋嘅價值觀係點形成？呢種家庭係點樣出現？
好似拋咗呢個情況出嚟 但又無深入咁探討
角色又有無成長
除咗家姐 其他人嘅思維又有冇改變
其實題材係無問題 但拍出嚟好平板 呢個先係問題
依家唔係想睇港台紀錄片 係想睇電影
電影嘅精髓係在於點樣用兩個鐘左右嘅時間
吸引到純大部分觀眾嘅目光 令佢哋有共鳴
我覺得呢套戲就真係做唔到
看劇情簡介時以為是一個平凡的故事 但原來情節一環扣一環極為寫實 真實得不知不覺中就能觸動觀眾的心靈
電影反映了每一個香港家庭總會面對的林林總總的問題 所以只要你不是擁有一個完美無瑕的家庭 你必定可以於電影裏輕易找到共鳴位
描寫家庭糾紛的戲劇不一定是要像溏心風暴式的大家族爭產或者包二奶等劇情才叫有戲味或者精彩 其實大部分家庭面對的問題都是由每日大大小小之矛盾糾紛堆積而成 導演以這角度帶出家庭此命題意外地更易令人感動和引起共鳴 這個有別於一般電影的設定亦是一個非常大膽之舉 而導演亦成功地把故事拍得細膩感人扣人心弦 令每位觀眾總能於觀賞後對個人自身 待人處世或家庭有一定反思
演員方面前輩們表現當然精彩 而新演員們的演出亦充滿驚喜
電影攝影及配樂以至主題曲均出色
是一套看完後令人有所得着的電影
若果抱着睇闔家辣，愛回家，飯戲攻心既心態去睇呢部電影，以為有呂爵安就一定搞笑的，唔好意思，你搞錯了。這一部不是喜劇，但也不是比悲傷更悲傷既劇。佢係一部令人反思既電影。
好感恩原來自己家庭係咁幸福，有啲家庭原來會咁，導演既親身經歷，演員既表現令我動容。要讚Mo姐的黑人憎，我以為佢係慈母，但原來咁惡死，成個家庭爛成咁佢真有責任，謝君豪令我睇到鄧佢唔抵，佢嗰種乜都唔表達令人激氣。呂爵安更加眼前一亮，你以為佢淨係識得做田田膠戰，搞笑誇張，sorry, 呢套戲比闔家辣更上一層樓，佢既沉實無奈叛逆你都feel到，而且你一定聽到佢講乜，所以呢部戲好值得睇。
多謝導演, 終於睇左過時過節, 勾起自己一幕幕成長中既片段, 眼淚不停地流。 睇到阿陽, 好似見返自己以前, 愛家人但卻唔識溝通, 選擇逃避, 但其實無解決到問題, 傷口越來越大, 卻行唔出修補關係既一步。 愛同溝通係家庭中最重要一課, 卻偏偏又係最難既一課, 往往可能因一件唔算非常嚴重事，最終化到好大，彼此傷害。但大家都搵唔到溝通既途徑同出路, 最後帶住傷痛遭憾地走下去。戲裡面每位角色都似曾相識, 真係好寫實, 一邊睇一邊深呼吸, 眼淚忍唔住甘流。
再次多謝導演, 多謝甘多位演員精湛演出, 讓自己藉著呢套戲得著好大反思同提醒。一家人可以齊齊整整已感恩, 學習放下,，行出一步去溝通, 所有問題都可以解決, 所有事情都可以有轉機。
更要多謝Edan唱既主題曲《攀上天梯的螞蟻》, 真係好感動, 片尾音樂一起, 第一句已完全唱出自己既心情...眼淚崩堤而流。
______________
傾偈 一秒鐘都激到暴斃
換來只有各自冷漠疏遠挫敗賭氣樣樣齊
.
.
誰全對 誰全錯 天秤上徘徊的蟻
你若會 我若會 卸除 一切防衞
.
.
傷已太深 沒人能計
誰明我 徘徊狂風裡的蟻
~~~~~~~
《過時. 過節》
一套今年自己最震撼最感動最喜歡既電影, 絕對值得推介。
一家人既題材好容易寫得老套，但呢一套冇，甚至乎你愈睇愈覺得唔係好跟你心中所想走。雖然好多人成日嘲笑bbq 大團圓結局，但睇完套戲我又見有人問點解個結局唔係團圓。其實我好buy 有<幾多個人黎咪幾多個人食>呢句，齊齊整整係各人心目中意義都唔同。我唔會去質疑有人對呢套劇既唔理解，阿陽點解會咁嬲。其實係因為係第一次講離婚既時候，根本就冇人肯作出解釋冇人肯溝通。阿陽同阿joy 傾果段其實都有講<我阿爸唔知發咩神經攞刀指住我阿媽>，我地睇戲既睇到會知究竟發生咩事，但阿陽係個故事到係唔知亦冇人話佢知，咁佢自然就會嬲個老豆咁對個阿媽。
Anyway純粹想解答下一d覺得阿陽走左去8年好牽強既人，而事實上搬離原生家庭係宜家呢個時代亦唔罕見，好多都係有一部份既怨恨同逃避係入面。
我好彩原生家庭好幸福，我欣賞亦唔係因為我代入到，而係由一個唔健康既屋企到發覺到自己屋企既好，反而覺得一家人一齊好好，要珍惜。
今年最喜歡的本土電影之一
喜歡的原因是有誠意，導演和製作團隊呈上一個發人深省的電影，引發觀眾思考「家庭」的種種 - 家人的互動、溝通，以致人格的形成。看了這電影三次，還在沉澱電影對自己的衝擊，喜歡這樣有深度能啟發思考的創作。這絕不是娛樂片，但看後留有餘甘，能細味再三，特別是片尾的主題歌曲「攀上天梯的螞蟻」很配合看完這電影當刻複雜的心情。
平實的電影不花巧，電影中的演員卻是各施渾身解數，毛姐、謝君豪、馮素波的演技不容置疑，幾位年輕演員如談善言、袁澧林，甚至初登銀幕的呂爵安都令人眼前一亮，演出真情流露，很舒服；配角梁祖堯和周志輝雖只亮相一、兩場，但亦令觀眾留下深刻印象。
得知這電影評價兩極，其實不用聽人講，最好就是自己入場觀看，反正各人的人生經歷不同、口味各異，特別是這樣沉重、引發思考的電影，自己睇，喜不喜歡，正好也是了解自己的一個途徑。
沒有華麗包裝，只有平實的劇本情節，好似發生嚮身邊，甚至係同自己有關的故事 ，各成員對家的愛的表達方法不同，方法亦無對與錯，令人對‘’家‘’作出反思。喜歡呢一部電影的某幾個的運鏡處理，像在現場目睹事件一樣，更能投入。演員們表現都很好，特別是父親與陽在路上相遇一幕及最後父親與玲的一幕，印象很深。
不知是編曲上有別、還是劇情帶動，在尾聲配上的主題曲更令人感動，歌曲旋律及歌詞內容成為幫助電影角色敍事及理解角色的部分。
#過時過節觀後感
含劇透，請自行選擇觀看
*
之前都有啲擔心套戲好沉重，睇完可能會好鬱結，喺呢啲Expectations下，我睇完反而冇沉重嘅感覺但係就有所思考。
毛姐同君豪：夫妻嘅對立，令我諗起我爸爸媽媽都有類似嘅經歷，爸爸沉默寡言，媽媽氣勢逼人，開口埋口都會怪責老公，但只係溝通嘅方法唔一樣，表達唔到出嚟只係苦了大家。
君豪同爵安：爵安同君豪嘅幾場對戲都做得好好，睇到我好心痛。喺車上面互相望到大家嘅嗰一刻係我流淚嘅開始，估唔到最親嘅人喺咁近嘅距離都做唔到溝通，無人敢開口。現實嘅我都係，好記得上次打風唔使返工，多咗時間喺屋企反而屋企變得好靜，好唔慣長時間對住父母，寧願匿喺房。
談善言：無自信嘅角色，我覺得呢個最似我，因為我都係一個唔使返工會扮返工嘅人，好驚同屋企人交代我攞假去做啲乜嘢，估唔到原來真係會有人同我一樣咁做。
呢套戲好簡單，冇特別嘢要反駁，好流暢睇得好入戲。演員梗有一個角色你可以代入到，故事雖然簡單，但係言簡意賅。
我最喜歡嘅角色演員係君豪，呢個藝人到而家都係咁吸引，好好戲，就算佢戲入面沉默寡言我自身都覺得佢做呢一個角色好有魅力。
我第二喜歡嘅角色演員係爵安，真係做到呀陽感覺，沉鬱性格其實呢8年好孤獨，其實佢好想同爸爸講嘢，但係又做唔到原諒佢。同高手過招都冇被比下去，交足戲。我同其他嘅朋友一齊去睇，佢都主動講話呂爵安做戲唔錯，好好！
我睇完呢套戲覺得原來自己都尚算係幸福，我又無特別沉咗落套戲入面，但係我身邊嘅朋友睇完就反思，同我分享返佢原來都有類似嘅經歷，同我分享咗好多。我覺得憑着呢套戲令自己了解吓自己同屋企人嘅關係最適合不過。
喺入面有好多螞蟻嘅場面，呢個咁藝術性嘅畫面我反而睇得好入迷，我更加喜歡主題曲攀上天梯的螞蟻，同套戲入面啲螞蟻嘅情節好有呼應嘅效果。唔知點解導演會諗起加入螞蟻呢？呢首歌究竟係幾時作詞呢？因為歌詞真係表達得好好，我最後淚崩嘅時候就係聽住結尾嘅呂爵安唱出主題曲，真係喊到收唔到聲。
呢套唔係大路嘅戲，亦都唔係主流嘅電影內容，更唔係劇力萬鈞情節，但係我好喜歡，劇本同拍攝稍有沙石但係唔重要。真心好讚賞。導演今次第一次拍就已經咁扣人心弦，努力俾心機下一套再有更進步嘅空間!
支持香港電影，支持本地演員，希望大家唔好得個講字，但為反而反。
*
我覺得這套電影是不錯的，當然有進步嘅空間，但絕對值得一看：
1 毛姐和君豪哥的故事很有真實感，相信不少香港家庭會有共鳴。當然兩位影帝影后的演技更加令電影生色不少，尤其是謝君豪演不善溝通的父親真是非常傳神。
2 由於在家得不到關心，兒子又離家出走，毛姐不自覺將感情寄托在鐘點家庭，甚至有些當成了自己的家。這個含蓄的表達方式不錯。
3 阿陽（呂爵安）的感情其實好複雜， 一方面恨他父親八年前冬至對他母親及他動手，但心裏其實渴望父親的關愛，最後的一場戲阿陽終於和父親對話是非常感動的，作為觀眾很開心見到兩父子終於打開心扉。不得不讚Edan的演出有驚喜，把這角色複雜的情感表達得很不錯。
4 劇本有可以改進的地方。首先是阿琪（家姐）的角色比較抽離，跟主線關係不明。另外阿陽為何要離家出走，如果在冬至飯局之前多一些鋪排，會更加令人信服。
在這個連講聲 Hongkonger都有風險的環境裏, 把電影英文名稱改成 Hong Kong Family已經好勇。曾導演表面上拍出了一個長達八年的家庭糾紛, 實際上卻隱喻處處, 說的並不只是一個身處香港的家庭…..
身為香港人的兒子與父親不算親密, 但從來沒否認他和父母的血緣關係。所以儘管在電影開始時已經出現家庭成員不和諧, 但他也嘗試努力做和事佬, 大家相安保事就好。
到「八年前」冬至飯局的大爆發, 父親揮刀威脅母親, 兒子大吼阻止, 雖然此舉並無法傷及父親分毫, 卻被父親認為”目無尊長” 並打了兩巴。兒子覺得父親行為無法接受, 憤而出走。到這裡, 父親比喻甚麼應該好明顯吧。
出走後的日子並非一直順利, 要睡公園租劏房。但兒子有骨氣, 咬緊牙關捱下去, 最終重拾正軌考得碩士。(家姐則是離家後生活不順、無奈回流的例子。雖然回家後的子日並不快樂, 但不動搖她擺脫家庭的念頭, 最後也決定報名working holiday。)
期間兒子並非沒有關心家人, 他和媽媽不時聯絡, 只與價值觀差天共地的父親不相往來。他也有反思過這是否自己不善溝通的問題, 於是用自己編寫的VR game練習溝通, 但看到VR內的父親毫無反應, 他確認了改善溝通技巧並不足夠; 只有對方有實際改變, 情況才有可能改善。
至於這個「家庭」困局該如何化解呢? 導演交出了一個很大的想像: 只有父親認錯道歉並決定離開, 「我唔番去就係想你番去」, 兒子才有試着回家的可能。但兒子也不是傻仔被講一句就信, 所以還是沒有立即回家, 改為與父親深入了解再作決定。這結局太妙想天開? 反正電影就是虛構的, 天馬行空讓觀眾開心下有甚麼所謂!
以上就是我看到電影要說的香港故事。導演好波!
所以這些電影要看就要及時, 否則不知甚麼時候會想看都無得看了。
我也會再去看多次, 留意其他支線隱藏着甚麼。也希望離開的人在其他地方都看到這部電影。希望他們的努力有一天不會白費。
最後, 片尾的主題曲, 好聽。