打噴嚏
- 查看其他版本
影評概況
觀眾影評
如果以同類型台灣電影作比較，打噴嚏嘅劇情會顯得尤其突兀；可惜觀眾近期將心力都放在兩齣港產片之上，冇乜點留意呢齣雪藏左六年仲橫空降落香港嘅好電影。
另一則評論只比3分；然而所觸及之處絕非正確。首先，打噴嚏唔係一齣普通嘅愛情電影，而係一齣有少少科幻嘅電影，但比起外國嘅marvel打打殺殺，更貼地同更著重主角之間嘅情感描寫。下三流電影好難會喺呢種題材上拿捏得準確，稍有不慎就變得太過「周星馳」feel，喜劇感乍現；然而打噴嚏好大程度保留左你會喺一齣英雄電影見到嘅先抑後揚同埋愛情電影嘅纏綿悱惻，最大特色嘅係渲染左好濃厚嘅台灣電影色彩——我係香港人，但唔好意思，我喺近期兩齣口碑甚佳嘅港產片只見倒一個好劇本拍成不中不西，百分百商業片。另外，又話女主角唔靚女，我諗林生一係就阿叔一係就係小學生，竟然唔知00年代蓆捲中港台、帶領台灣衝出東亞嘅電視劇就正正係林依晨主演嘅惡作劇之吻……坦白講，有林建豪林依晨主ft新一代嘅柯震東王大陸主演，加埋古天樂客串，一份爛劇本同一個爛導演真係有錢就駕馭倒？
電影採用左近年新起嘅雙高潮，有別於平實敍事同傳統嘅單高潮，劇情嚟得更加豐富、觀眾會睇得更加投入同爽，而角色成長都容許左更加多嘅起伏。其實就咁睇個戲名同埋簡介會完全唔知道電影係同超能力有關，但係正如我頭先提到，超能力呢種英雄電影嘅元素完美咁融入左呢齣電影，非主打而只為一些點綴；老母唔鍾意睇愛情片同英雄片呢啲後生嘢，睇完幻愛之後覺得好新奇，而睇打噴嚏嗰陣更加睇到踢哂凳。我諗大家要明白呢齣電影冰封六年再出世背後獲得嘅支持不容小覷。
不得不提嘅係打噴嚏同嗰一拳……相信大家喺trailer都睇到林依晨間唔中會打哈嚏，而呢個動作由最初嘅有少少無厘頭（無可否認），直到中部嘅唔少gag位同增潤情節，至結尾高潮嘅推波助瀾可謂一脈相承；而嗰一拳亦都同呢個動作有微妙嘅關係。即使喺一個世界觀有啲騎呢嘅世界，男女主角嘅愛依然能夠完美融入之餘更充滿緣份，我諗正正係呢齣戲嘅浪漫之處。
然而，此電影個結局未必人人鍾意，請帶定紙巾入場。