職場女王攻略 電影資料
男人40一枝花，女人40都可以誇啦啦！年齡不過係數字，心態先至決定境界。
喺超級市場打工嘅馬姐（珍妮花露柏絲 飾）工作表現一向完美，弊在爭張沙紙先升到做經理。眼見高分低能嘅四眼薯嘜升做阿頭，馬姐當然唔甘心，但唔通4字頭先學人追夢？點知好朋友偷偷地幫佢「改造」咗份完美嘅CV寄去應徵，令佢一頭霧水咁通過面試，仲唔覺意入咗跨國企業，做埋萬人之上嘅真正高層﹗雖然獲得夢寐以求嘅工作同生活，之但係紙包唔住火，馬姐要捉緊機會向世界證明，佢嘅實力絕對抵得住一紙學歷！
職場女王攻略
關於職場女王攻略
由久未現身大銀幕嘅樂壇天后珍妮花露柏絲（Jennifer Lopez）主演兼監製、《特務S嘜》（Get Smart）彼得薜高（Peter Segal）執導嘅爆笑新作《職場女王攻略》（Second Act）教精大家，就算係熟女，就算冇學歷，但只要一日有夢，一日都仲可以「妞」轉人生！一班傍住職場靚姐珍妮花露柏絲上位做高層嘅演員仲包括《地心探險記2：世外秘島》（Journey 2: The Mysterious Island）女星雲妮莎夏芝絲（Vanessa Hudgens）、艾美獎女星莉雅李美莉（Leah Remini）、冠軍收視劇集《This Is Us》艾美獎提名視帝米路雲提米利亞（Milo Ventimiglia）等。
