永恆族
- 查看其他版本
觀眾影評
還不錯，衹不過中間有點無聊'
一套衰在完全唔夠時間舖排、適合分兩集上嘅電影。
一樣係內鬨，一樣係接近10個主要角色，有N套獨立電影做人物背景support夠時間舖排vs完全冇人物背景support冇時間舖排，已經唔講打鬥，5年前是但一樣野都屌打呢套永恆族，本身永恆族入面想探討嘅命題好好，但好可惜最後半個鐘先開始探討，點到即止，浪費晒。
Steve: “You know I wouldn't do this if I had any other choice, but he's my friend.”
Tony: “So was I...”
對白設計都差勁遠...睇完Eternals，好似只係記得“Ikea...”
永恆族，一套成功將marvel招牌大大力掉落地下再踩多N下嘅電影...
重申，本人本身乃重度marvel迷，影評完全主觀，絕不客觀，史上被公認為爛片都有人鍾意，如果唔認同呢次影評，都係好正常。
故事背景設定係10個永恆族，佢地受星神族指示保護地球免受變異族入侵，但除咗Ikaris同Ajak，大部分都唔知星神族背後咁樣做有陰謀，眾多星球（包括地球）都係種咗星神族後代嘅種子，令佢發芽係需要個星球有足夠大量智慧生物成長，當個星球儲夠人數，星神族就會由地底爆出黎，地球就爆炸滅亡，然後星神族就可以再創造其他星球生物等等，係循環黎，而變異族同永恆族其實都係星神族整出黎，只係變異族係失敗品，本身想設計佢哋黎食啲冇咩智慧嘅生物，讓有智慧嘅生物繁殖，但佢哋唔受控制見生物就食，於是整永恆族出黎執返星神族自己啲屎。
首先，同我預計一樣完全唔足夠嘅舖排，太多角色了，一開波冇耐就處死咗一個永恆族，但依然唔夠時間去話比觀眾聽佢地嘅性格經歷變化，好簡單，如果唔係後段最細粒嗰個自己親口講，觀眾根本唔會知最細粒嗰個對人類有憎惡同妒忌嘅念頭，中段透過佢隊友Kingo講出口大家先知佢暗戀男主角，暗戀暗到幾乎睇唔到，完全冇通過舉動/交流去讓你睇到細粒女見到男女主角一齊會呷醋，個人認為如果唔夠時間去舖更多嘅感情線，不如唔好搞暗戀啦，要講出口觀眾先知，好低質嘅演釋手法。
仲有男主角Ikaris，我明個戲想設定到佢沉默寡言同孤獨，中後段話其實係佢殺咗Ajak，因為Ajak開始搵方法召集大家阻止星神族由地球爆出黎，然後Ikaris抱住做咗幾千年隊友Ajak條屍，表現痛苦咁射死光同嗌，問題黎喇，到底係代表Ikaris好後悔好唔情願殺佢？但Ikaris推佢落去嗰時又好堅定好冷酷咁殺佢，完全唔係x-men Logan殺Jean之前嗰種不捨，好奇怪。另外唔足夠嘅舖排，導致我覺得Ikaris同女主角Sersi似SP多過似夫妻，扑野、結婚、粒聲唔出走咗去幾千年，明知老婆鍾意同人類共存，但係瞞住佢有關星神族嘅陰謀，咁多大事完全同老婆冇傾過，至少我感受唔到佢對女主角有幾多愛，呢樣野導致後來佢準備用死光射女主角時好左膠咁停手就好怪了，因為觀眾完全睇唔出男女主角感情到底有幾深，亦感受唔到佢地嘅愛。
而女主角嘅思想已經係成套戲入面大家比較易代入嘅角色，但佢嘅技能設定我去到最後都係問號。。開頭話自己可以將啲野轉做唔同物質，酒變水變石變土，但係危急關頭佢將隻變異族變成樹，樹唔係生命體黎咩？到飛船上面再問，佢自己都話I don't know，咁到底啲技係點？冇人解釋到...而手指可以射槍嘅kingo，最後大戰之前選擇唔幫任何一邊，用中立方式離開消失於鏡頭，始終佢都係其中一個星神族打手，打咗咁耐呢個關頭話唔揀任何side，好似唔關自己事咁走咗去，當然有人覺得中立都係立場，我唔認同啦，因為中立咪即係幫星神族囉
另外成套戲前中段不停跳黎跳去敍述同過場，觀眾唔介意上歷史堂，但不停跳黎去嘅時間線同地區穿插，簡直睇到令人來回地獄又折返人間，跳得太急太多，趕頭趕命，跳到我都有啲攰。
仲有就係，明知套野已經時間緊逼，但係仲要寫到唔知幾多方嘅勢力，開頭主角一方，變異族一方，去到中段開始星神族同Ikaris同細粒女一方，然後其他主角一方，變異族一方，N方對立咁，睇高達呀？Ikaris緊急關頭仲要無啦啦收手變左膠轉立場，再無啦啦一句對唔住衝去太陽自殺？道歉同自殺得莫名其妙，在於所有野前面太急，所有野都交待不足，有冇人可以講得出到底佢係出於殺死Ajak內疚而喊同道歉去自殺？出於同自己老婆對抗內疚？對於呃咗老婆咁耐內疚？係乜呢？冇講，9衝去太陽，完，唔係爛尾係乜？仆你個街。
當我睇完venom以為應該係今年睇過最垃圾嘅戲，原來呢套仲垃圾。
劇情雜亂無章，人物描寫角色塑造嚴重不足，莫名其妙嘅立場轉變，打鬥方面，男主角除咗飛起黎射死光其實冇乜野睇，最好睇嗰場打鬥反而係跑得快好世界嗰個Makkari按住Ikaris喺牆邊瘋狂屌打同埋Phastos用科技hard counter男主角嗰陣，其他打鬥你會覺得：吓，咁樣咋？論打鬥動作設計，連尚氣都屌打呢套。
講多個好大嘅問題，呢套戲始終叫做MCU一部分，地球發生咁大件事，嚴重到直頭有野喺地底爆出黎，世界末日喎！Avengers呢？佢哋唔知，訓緊覺都算，是但一架軍方直升機？是但一個記者？會唔會太唔合理？人影都唔見，bruce佢地，奇異博士佢地，咁撚大件事，真係冇一個人知冇一個人理過冇人介入？唔講仲以為單野發生喺遠古時代。尚氣都至少有幾個MCU人物出黎比你見到，呢套只靠幾句對白提過MCU角色帶過。
呢套戲其實提出咗幾個好有深度嘅問題，但礙於角色太多，時間不足等等，冇同觀眾一齊深入討論/剖析過。
自由意志下嘅戰爭vs思想控制下嘅和平；
天理循環見死不救為大局犧牲少數vs救得就救生命皆平等可貴；如果唔好搞暗戀，頂盡先集中放5個永恆族出現從而加強人物塑造，出第2集先再介紹另外5個永恆族，唔好咁貪心樣樣都講，一次只深入探討一個命題，其實套戲會好睇好多，觀眾會易消化吸引好多同埋拎到野走，尋日睇完有種感覺係我睇咗乜？我學咗啲乜野？拋咗好多深層次問題比觀眾，但冇引領觀眾去深入思考，頂盡只有一句，「當你愛一樣野，你盡全力保護佢。」
個人認為呢套仲難睇過captain marvel。